బ్లాక్‌బస్టర్ తర్వాత ఓటీటీలోకి 'లెనిన్'

అఖిల్ అక్కినేని కెరీర్‌లో అత్యంత విజయవంతమైన చిత్రంగా నిలిచిన 'లెనిన్' ఇప్పుడు ఓటీటీ ప్రేక్షకులను అలరించేందుకు సిద్ధమవుతోంది. మురళీ కిషోర్ అబ్బూరు దర్శకత్వంలో తెరకెక్కిన ఈ చిత్రంలో భాగ్యశ్రీ భోర్సే కథానాయికగా నటించగా, జూలై 10న విడుదలైన ఈ సినిమా తక్కువ రోజుల్లోనే బ్రేక్ ఈవెన్ సాధించి మంచి వసూళ్లు నమోదు చేసింది. అన్నపూర్ణ స్టూడియోస్, సితారా ఎంటర్‌టైన్‌మెంట్స్, మనం ఎంటర్‌ప్రైజెస్ ఎల్‌ఎల్‌పీ సంయుక్తంగా ఈ చిత్రాన్ని నిర్మించాయి.

సుమారు రూ.55 కోట్ల బడ్జెట్‌తో రూపొందిన ఈ చిత్రానికి నాన్-థియేట్రికల్ బిజినెస్ సుమారు రూ.34 కోట్లకు జరిగినట్లు సమాచారం. డిజిటల్, శాటిలైట్ హక్కులను జీ5 సంస్థ సుమారు రూ.19 కోట్లకు సొంతం చేసుకున్నట్లు ప్రచారం జరుగుతోంది. ట్రేడ్ వర్గాల అంచనాల ప్రకారం ప్రపంచవ్యాప్తంగా సుమారు రూ.80 కోట్ల గ్రాస్ వసూలు చేసినప్పటికీ, నిర్మాతలు మాత్రం ఈ చిత్రం రూ.100 కోట్ల క్లబ్‌లో చేరినట్లు అధికారికంగా ప్రకటించారు.