ఆమిర్ ఖాన్ నా స్ఫూర్తి.. వరుణ్ తేజ్ ఆసక్తికర వ్యాఖ్యలు

మెగా ప్రిన్స్ వరుణ్ తేజ్ తన సినిమా ఎంపికల విషయంలో బాలీవుడ్ స్టార్ ఆమిర్ ఖాన్ తనకు పెద్ద స్ఫూర్తి అని వెల్లడించారు. 'కొరియన్ కనకరాజు' ప్రమోషన్స్ సందర్భంగా మాట్లాడిన ఆయన, ఆమిర్ ఖాన్ లాగే విభిన్నమైన కథలు, పాత్రలను ఎంచుకోవాలని కెరీర్ ప్రారంభం నుంచే ప్రయత్నిస్తున్నానని చెప్పారు. అందుకే ఎప్పటికప్పుడు కొత్త తరహా సినిమాలు చేయాలని తన లక్ష్యమని తెలిపారు.

ఇటీవల తన కెరీర్‌లో ఆ సమతుల్యత కొంత దెబ్బతిన్న విషయాన్ని అంగీకరించిన వరుణ్ తేజ్, ఈసారి మాత్రం పూర్తి ప్రణాళికతో ముందుకు వెళ్లానని చెప్పారు. షూటింగ్ ప్రారంభానికి ముందే దర్శకుడు మేర్లపాక గాంధీతో కథపై విస్తృతంగా చర్చించి ప్రతి అంశాన్ని సిద్ధం చేసుకున్నానని వెల్లడించారు. ఇండో-కొరియన్ హారర్ కామెడీగా తెరకెక్కిన 'కొరియన్ కనకరాజు' ఆగస్టు 7న ప్రేక్షకుల ముందుకు రానుంది.