కథే ముఖ్యం.. పాత్రలే నా బలం: త్రిప్తి డిమ్రీ

‘యానిమల్’ సినిమాతో విపరీతమైన గుర్తింపు సంపాదించిన బాలీవుడ్ నటి త్రిప్తి డిమ్రీ ప్రస్తుతం వరుస సినిమాలతో బిజీగా ఉన్నారు. తెలుగులో ప్రభాస్ సరసన సందీప్ రెడ్డి వంగా తెరకెక్కిస్తున్న ‘స్పిరిట్’లో హీరోయిన్‌గా నటిస్తున్నారు. తాజాగా ఓ ఇంటర్వ్యూలో మాట్లాడిన త్రిప్తి, విజయానికి తాను ఎలాంటి ఫార్ములాను అనుసరించలేదని, సినిమాపై ఉన్న ప్రేమే తనను ఈ స్థాయికి తీసుకువచ్చిందని చెప్పారు. ప్రతి సినిమా, ప్రతి సవాలు తన నటనను మరింత మెరుగుపరిచిందని ఆమె పేర్కొన్నారు.

విజయాల తర్వాత తనకు వచ్చే కథల తీరు మారిందని, ప్రస్తుతం దర్శకులు వైవిధ్యమైన పాత్రలతో తనను సంప్రదిస్తున్నారని త్రిప్తి తెలిపారు. అయితే కథతో, పాత్రతో తనకు అనుబంధం ఏర్పడితేనే ఆ సినిమా చేస్తానని స్పష్టం చేశారు. ఒకే తరహా పాత్రల్లో నటించడంపై ఆసక్తి లేదని, తనను సవాలు చేసే విభిన్న పాత్రలే తనకు ఇష్టమని చెప్పారు. ప్రేక్షకుల అంచనాలు తనను భయపెట్టవని, మరింత మెరుగైన నటన కనబరచేందుకు ప్రేరణగా నిలుస్తాయని వెల్లడించారు.