కొత్త ప్రేమకథతో సుమంత్ ప్రభాస్ మూవీ ప్రారంభం

‘రాజు వెడ్స్ రాంబాయి’ దర్శకుడు సాయిలు కాంపాటి తెరకెక్కిస్తున్న కొత్త చిత్రంలో ‘మెమ్ ఫేమస్’ ఫేమ్ సుమంత్ ప్రభాస్ కథానాయకుడిగా నటిస్తున్నారు. శ్రీ వెంకటేశ్వర సినిమాస్ బ్యానర్‌పై ప్రొడక్షన్ నెం.10గా రూపొందుతున్న ఈ సినిమాను పుష్కూర్ రామ్మోహన్ రావు, భరత్ నారంగ్ సంయుక్తంగా నిర్మిస్తున్నారు. హైదరాబాద్‌లోని సికింద్రాబాద్ గణేష్ ఆలయంలో పూజా కార్యక్రమాలతో చిత్రాన్ని ప్రారంభించగా, దర్శకుడు శేఖర్ కమ్ముల కెమెరా స్విచ్ ఆన్ చేయగా, హీరో అడివి శేష్ తొలి షాట్‌కు క్లాప్ కొట్టారు.

చిన్న పట్టణం నేపథ్యంలో సాగే ఈ ప్రేమకథలో సుమంత్ ప్రభాస్ ఉత్సాహంగా, వినోదాత్మకంగా ఉండే యువకుడి పాత్రలో కనిపించనున్నారు. ప్రేమ, కుటుంబ భావోద్వేగాలు, హాస్యాన్ని సమతూకంగా మేళవిస్తూ అన్ని వర్గాల ప్రేక్షకులను ఆకట్టుకునేలా కథను రూపొందిస్తున్నట్లు చిత్రబృందం తెలిపింది. త్వరలోనే రెగ్యులర్ షూటింగ్ ప్రారంభం కానుండగా, మిగిలిన నటీనటులు, సాంకేతిక నిపుణుల వివరాలను త్వరలో అధికారికంగా ప్రకటించనున్నారు.