ఆర్‌సీ17కు దేవిశ్రీ ప్రసాద్ స్థానంలో కొత్త సంగీత దర్శకుడా?

దర్శకుడు సుకుమార్, హీరో రామ్ చరణ్ కాంబినేషన్‌లో తెరకెక్కనున్న ఆర్‌సీ17 చిత్రానికి సంగీత దర్శకుడిగా కొత్త పేరును పరిశీలిస్తున్నట్లు టాలీవుడ్‌లో జోరుగా ప్రచారం జరుగుతోంది. ఆర్య నుంచి పుష్ప 2 వరకు సుకుమార్ ప్రతి చిత్రానికీ దేవిశ్రీ ప్రసాద్ సంగీతం అందించగా, ఈసారి ఆయన స్థానంలో శాశ్వత్ సచ్‌దేవ్‌ను తీసుకునే అవకాశం ఉందని ఇండస్ట్రీ వర్గాలు చెబుతున్నాయి. అయితే దీనిపై చిత్ర బృందం నుంచి ఇంకా అధికారిక ప్రకటన వెలువడలేదు.

దేవిశ్రీ ప్రసాద్ ప్రస్తుతం ఎల్లమ్మ చిత్రంతో నటుడిగా కూడా బిజీగా ఉండటంతో ఈ మార్పు జరిగి ఉండొచ్చనే చర్చ నడుస్తోంది. మరోవైపు ఆర్‌సీ17 ప్రీ-ప్రొడక్షన్ పనులు కొనసాగుతున్నాయి. సెప్టెంబర్‌లో పూజా కార్యక్రమాలు నిర్వహించి, దసరా తర్వాత రెగ్యులర్ షూటింగ్ ప్రారంభించే అవకాశాలు ఉన్నట్లు సమాచారం.