'వారణాసి'పై రాజమౌళి ఆసక్తికర అప్‌డేట్.. షూటింగ్ చివరి దశలో

మహేష్ బాబు ప్రధాన పాత్రలో ఎస్.ఎస్. రాజమౌళి తెరకెక్కిస్తున్న భారీ చిత్రం 'వారణాసి'పై కొత్త వివరాలు వెలుగులోకి వచ్చాయి. టైమ్ ట్రావెల్ కాన్సెప్ట్‌తో రూపొందుతున్న ఈ సినిమా వారణాసిలో ప్రారంభమై అంటార్కిటికా, ఆఫ్రికా, పురాతన రోమ్ నగరం వరకు సాగే అద్భుతమైన ప్రయాణాన్ని చూపించి, చివరికి మళ్లీ వారణాసిలోనే ముగుస్తుందని రాజమౌళి తెలిపారు. ఇప్పటికే దాదాపు 80 శాతం షూటింగ్ పూర్తయిందని, కీలక యాక్షన్ సన్నివేశాలు కూడా చిత్రీకరించినట్లు వెల్లడించారు.

మిగిలిన చిత్రీకరణను దసరా నాటికి పూర్తి చేయాలనే లక్ష్యంతో చిత్రబృందం వేగంగా పనులు కొనసాగిస్తోంది. ఈ చిత్రంలో పృథ్వీరాజ్ సుకుమారన్ కీలక పాత్రలో నటిస్తుండగా, ప్రియాంక చోప్రా కథానాయికగా కనిపించనున్నారు. కె.ఎల్. నారాయణ నిర్మిస్తున్న ఈ చిత్రానికి ఎం.ఎం. కీరవాణి సంగీతం అందిస్తున్నారు. ఈ సినిమా 2027 ఏప్రిల్ 7న ప్రపంచవ్యాప్తంగా విడుదల కానుంది.