శ్రీశైలం ఆలయంలో ప్రాజెక్టుపై కొత్త వివాదం

శ్రీశైలం దేవస్థానంలో రూ.19 కోట్ల వ్యయంతో సాలు మండపాల నిర్మాణ ప్రతిపాదనపై దేవదాయ శాఖ కమిషనర్ రామచంద్ర మోహన్, ధర్మకర్తల మండలి మధ్య విభేదాలు తలెత్తాయి. ఈ ప్రతిపాదనను ధర్మకర్తల మండలి రెండుసార్లు ఏకగ్రీవంగా తిరస్కరించినప్పటికీ, కమిషనర్ తన విచక్షణాధికారాలను వినియోగించి టెండర్ల ప్రక్రియ కొనసాగించాలని ఆదేశించినట్లు సమాచారం. అనంతరం దేవస్థానం ఈఓ టెండర్లను ఆహ్వానించినట్లు తెలుస్తోంది.

భక్తులకు అత్యవసరమైన క్యూ కాంప్లెక్స్, ప్రజా సౌకర్యాల కాంప్లెక్స్, టాయిలెట్ల నిర్మాణానికే ప్రాధాన్యం ఇవ్వాలని ధర్మకర్తల మండలి నిర్ణయించినట్లు పేర్కొంది. తమ తీర్మానాన్ని పట్టించుకోకుండా టెండర్ల ప్రక్రియ కొనసాగించడం సరికాదని అభిప్రాయపడిన దేవస్థానం చైర్మన్, కమిషనర్ వ్యవహారశైలిపై అభ్యంతరం వ్యక్తం చేస్తూ ముఖ్యమంత్రి ఎన్. చంద్రబాబు నాయుడికి బహిరంగ లేఖ రాశారు.