పార్లమెంట్ ప్రతిష్ఠంభనపై రాహుల్‌తో రిజిజు భేటీ

పార్లమెంటు వర్షాకాల సమావేశాల్లో కొనసాగుతున్న ప్రతిష్ఠంభనకు పరిష్కారం కనుగొనే ప్రయత్నంలో భాగంగా పార్లమెంటరీ వ్యవహారాల మంత్రి కిరణ్ రిజిజు ప్రతిపక్ష నేత రాహుల్ గాంధీతో పార్లమెంట్ భవన్‌లో సమావేశమయ్యారు. దాదాపు 50 నిమిషాల పాటు సాగిన ఈ సమావేశంలో ప్రతిపాదిత నియోజకవర్గాల పునర్విభజన బిల్లు, విదేశీ విరాళాల నియంత్రణ చట్టం (ఎఫ్‌సీఆర్‌ఏ) బిల్లు సహా పలు కీలక అంశాలపై చర్చ జరిగింది. సమావేశంలో ప్రియాంక గాంధీ వాద్రా, గౌరవ్ గొగోయ్, కె.సి. వేణుగోపాల్ కూడా పాల్గొన్నారు.

జూలై 20న ప్రారంభమైన వర్షాకాల సమావేశాల నుంచి లోక్‌సభలో ప్రశ్నోత్తరాల సమయం ఒక్కరోజు కూడా పూర్తికాకపోవడంతో పాటు పలు బిల్లులు చర్చ లేకుండానే ఆమోదం పొందాయి. రాహుల్ గాంధీతో సమావేశం అనంతరం కిరణ్ రిజిజు కేంద్ర హోంమంత్రి అమిత్ షాతో కూడా భేటీ అయ్యారు. త్వరలో ఇతర ప్రతిపక్ష నాయకులతో కూడా చర్చలు జరిపి సభా ప్రతిష్ఠంభనను తొలగించేందుకు ప్రభుత్వం ప్రయత్నాలు కొనసాగించనుంది.