రవితేజ కుటుంబం నుంచి కొత్త హీరో ఎంట్రీకి తేదీ ఖరారు

రవితేజ తమ్ముడి కుమారుడు మాధవ్ భూపతిరాజు హీరోగా పరిచయం అవుతున్న తొలి చిత్రం మారెమ్మ విడుదల తేదీ అధికారికంగా ఖరారైంది. మంచాల నాగరాజు దర్శకత్వంలో యథార్థ సంఘటనల ఆధారంగా రూపొందుతున్న ఈ గ్రామీణ యాక్షన్ డ్రామాలో దీపా బాలు కథానాయికగా నటిస్తున్నారు. వినోద్ కుమార్, వీఎస్ రూపా లక్ష్మి, దయానంద్ రెడ్డి కీలక పాత్రలు పోషిస్తున్న ఈ చిత్రాన్ని వినాయక చవితి సందర్భంగా సెప్టెంబర్ 10న థియేటర్లలో విడుదల చేయనున్నట్లు చిత్రబృందం ప్రకటించింది.

మోక్ష ఆర్ట్స్ పతాకంపై మయూర్ రెడ్డి బండారు నిర్మిస్తున్న ఈ చిత్రానికి ప్రశాంత్ ఆర్. విహారి సంగీతం అందిస్తున్నారు. ఇప్పటికే విడుదలైన టీజర్ గ్రామీణ నేపథ్యం, భావోద్వేగాలు, యాక్షన్ అంశాలతో ప్రేక్షకుల దృష్టిని ఆకర్షించింది. రవితేజ కుటుంబం నుంచి వస్తున్న కొత్త హీరోగా మాధవ్ భూపతిరాజుపై సినీ వర్గాల్లో ఆసక్తి నెలకొంది. తొలి చిత్రంతో ఆయన ఎలాంటి ముద్ర వేస్తారో చూడాలని అభిమానులు ఆసక్తిగా ఎదురుచూస్తున్నారు.