రాశి ఖన్నాకు రజనీకాంత్ ప్రత్యేక బహుమతి

ప్రస్తుతం ‘ధర్మన్’ సినిమాలో సూపర్ స్టార్ రజనీకాంత్‌తో కలిసి నటిస్తున్న రాశి ఖన్నా, షూటింగ్ సమయంలో జరిగిన ఒక ప్రత్యేక సంఘటనను అభిమానులతో పంచుకున్నారు. ఆధ్యాత్మికతపై మాట్లాడుతున్న సమయంలో రజనీకాంత్ ‘Living with the Himalayan Masters’ పుస్తకం గురించి అడిగారని, తాను చదవలేదని చెప్పడంతో రెండు రోజులకే స్వయంగా ఆ పుస్తకాన్ని కొనిపెట్టి బహుమతిగా ఇచ్చారని ఆమె తెలిపారు.

ఆ పుస్తకాన్ని చదివిన తర్వాత తన ఆలోచనా విధానంలో మార్పు వచ్చిందని రాశి చెప్పారు. ఇతరులను మెప్పించడానికి మన అసలు వ్యక్తిత్వాన్ని దాచుకోవడం కాకుండా, మనల్ని మనం అంగీకరించుకోవడమే నిజమైన ఎదుగుదల అని ఆ పుస్తకం ద్వారా తెలుసుకున్నానని పేర్కొన్నారు. రజనీకాంత్ ఇచ్చిన ఈ బహుమతి తన జీవితంలో ఎంతో విలువైన పాఠాన్ని నేర్పిందని ఆమె వెల్లడించారు.