భోగాపురం వేడుకల్లో థింసా నృత్యాన్ని ప్రశంసించిన ప్రధాని మోదీ

భోగాపురంలోని అల్లూరి సీతారామరాజు అంతర్జాతీయ విమానాశ్రయం ప్రారంభోత్సవ సందర్భంగా నిర్వహించిన భారీ థింసా నృత్య ప్రదర్శనపై ప్రధాని నరేంద్ర మోదీ ప్రశంసలు కురిపించారు. సోషల్ మీడియా వేదికగా స్పందించిన ఆయన, 13 వేల మందికి పైగా పాల్గొన్న ఈ అపూర్వ ప్రదర్శన తనను ఎంతో కదిలించిందని తెలిపారు. ఆంధ్రప్రదేశ్ ప్రజల ఆత్మీయతకు ఇది ప్రతీకగా నిలిచిందని, థింసా నృత్యం రాష్ట్ర గొప్ప సాంస్కృతిక వారసత్వాన్ని అద్భుతంగా ప్రతిబింబించిందని పేర్కొన్నారు.

ఈ సాంప్రదాయ గిరిజన నృత్య ప్రదర్శన భోగాపురం విమానాశ్రయ ప్రారంభోత్సవాన్ని మరింత ప్రత్యేకంగా, చిరస్మరణీయంగా మార్చిందని ప్రధాని అన్నారు. వేలాది గిరిజన మహిళల సమిష్టి ప్రదర్శన ఉత్తరాంధ్ర సాంస్కృతిక వైభవాన్ని దేశవ్యాప్తంగా చాటిచెప్పిందని, ఈ కార్యక్రమం రాష్ట్ర సంప్రదాయాలకు విశేష గుర్తింపు తీసుకువచ్చిందని ఆయన అభిప్రాయపడ్డారు.