భోగాపురం విమానాశ్రయాన్ని ప్రారంభించిన ప్రధాని మోదీ

ప్రధానమంత్రి నరేంద్ర మోదీ భోగాపురంలోని అల్లూరి సీతారామరాజు అంతర్జాతీయ విమానాశ్రయ టెర్మినల్ భవనాన్ని ప్రారంభించి దేశానికి అంకితం చేశారు. ఈ కార్యక్రమంలో గవర్నర్ ఎస్. అబ్దుల్ నజీర్, ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్, కేంద్ర పౌర విమానయాన శాఖ మంత్రి రామ్మోహన్ నాయుడు పాల్గొన్నారు. ప్రధాని సుమారు 15 నిమిషాల పాటు టెర్మినల్‌ను పరిశీలిస్తూ చెక్-ఇన్ హాల్, ఆధునిక సదుపాయాలు, విమానాశ్రయ మాస్టర్ ప్లాన్, ఏవియేషన్ హబ్ అభివృద్ధి ప్రణాళికలపై జీఎంఆర్ ప్రతినిధుల నుంచి వివరాలు తెలుసుకున్నారు.

ప్రారంభోత్సవ వేడుకల్లో భాగంగా రికార్డు స్థాయిలో 13,500 మంది కళాకారులు ప్రదర్శించిన సంప్రదాయ థింసా నృత్యాన్ని ప్రధాని మోదీ ఓపెన్‌టాప్ వాహనంలో వీక్షించారు. అనంతరం ముఖ్యమంత్రి చంద్రబాబు నాయుడు బొబ్బిలి వీణను జ్ఞాపికగా అందజేశారు. ఉత్తరాంధ్ర అభివృద్ధికి ఈ విమానాశ్రయం కీలక మైలురాయిగా నిలవడంతో పాటు, పర్యాటకం, పరిశ్రమలు, పెట్టుబడులు మరియు అంతర్జాతీయ అనుసంధానానికి కొత్త అవకాశాలను తెరవనుందని ప్రభుత్వం భావిస్తోంది.