నీరజ్‌కు రజతం.. శ్రీలంకకు జావెలిన్ స్వర్ణం

గ్లాస్గోలో జరిగిన 2026 కామన్‌వెల్త్ గేమ్స్ పురుషుల జావెలిన్ త్రో ఫైనల్లో నీరజ్ చోప్రా రజత పతకాన్ని సొంతం చేసుకున్నాడు. సుమారు 14 డిగ్రీల చల్లని వాతావరణంలో పోటీ జరిగినప్పటికీ నీరజ్ తన సీజన్ బెస్ట్ అయిన 85.83 మీటర్ల త్రో నమోదు చేశాడు. అయితే శ్రీలంకకు చెందిన 23 ఏళ్ల రుమేశ్ తరంగా పతిరాగే రెండో ప్రయత్నంలో 89.75 మీటర్ల అద్భుత త్రోతో స్వర్ణాన్ని కైవసం చేసుకున్నాడు. భారత్‌కు చెందిన యశ్ వీర్ సింగ్ చివరి ప్రయత్నంలో 85.41 మీటర్ల వ్యక్తిగత అత్యుత్తమ ప్రదర్శనతో కాంస్య పతకం గెలుచుకోగా, రోహిత్ యాదవ్ 81.56 మీటర్లతో ఏడో స్థానంలో నిలిచాడు.

రజత పతకం సాధించిన తర్వాత స్పందించిన నీరజ్, భారత అథ్లెట్లు ఇద్దరూ పోడియంపై నిలవడం తనకు ఎంతో ఆనందంగా ఉందని అన్నారు. యశ్ వీర్ సింగ్ వ్యక్తిగత అత్యుత్తమ ప్రదర్శన చేయడం అభినందనీయమని, తాను కూడా సీజన్ బెస్ట్ నమోదు చేయడంతో తన కమ్‌బ్యాక్ సరైన దిశలో సాగుతోందని పేర్కొన్నారు. మరోవైపు కామన్‌వెల్త్ గేమ్స్ డిఫెండింగ్ ఛాంపియన్ అర్షద్ నదీమ్ 77.41 మీటర్ల త్రోతో తొమ్మిదో స్థానంలో నిలిచి నిరాశపరిచాడు. భారత అభిమానులతో పాటు వేలాది మంది ప్రేక్షకులు స్టేడియంలో నీరజ్ ప్రదర్శనను ప్రత్యక్షంగా వీక్షించారు.