బోనాల నేపథ్యంలో హైదరాబాద్‌లో మద్యం దుకాణాలు బంద్

మహంకాళి బోనాల ఉత్సవాల సందర్భంగా హైదరాబాద్‌లో శాంతిభద్రతలను దృష్టిలో ఉంచుకుని నగర పోలీస్ కమిషనర్ వి.సి. సజ్జనార్ కీలక ఆదేశాలు జారీ చేశారు. రాజేంద్రనగర్, గోల్కొండ జోన్ల పరిధిలోని వైన్ షాపులు, కల్లు దుకాణాలు, రెస్టారెంట్లకు అనుబంధంగా ఉన్న బార్లు ఆగస్టు 9 ఉదయం 10 గంటల నుంచి ఆగస్టు 10 ఉదయం 10 గంటల వరకు మూసివేయాలని ఆదేశించారు. చార్మినార్ జోన్‌లో మాత్రం ఈ నిషేధం ఆగస్టు 11 ఉదయం 10 గంటల వరకు అమల్లో ఉంటుంది.

ప్రతి ఏడాది భారీ సంఖ్యలో భక్తులు పాల్గొనే బోనాల ఉత్సవాలు ప్రశాంతంగా జరిగేలా ఈ చర్యలు తీసుకున్నట్లు పోలీసులు తెలిపారు. అయితే స్టార్ హోటళ్లకు అనుబంధంగా ఉన్న బార్లు, రిజిస్టర్డ్ క్లబ్‌లలోని బార్లకు ఈ నిషేధం నుంచి మినహాయింపు కల్పించారు. ఉత్సవాల సందర్భంగా ప్రజలు పోలీసుల ఆదేశాలను పాటించాలని అధికారులు కోరారు.