ఆదివారం భారత్-పాకిస్థాన్ లెజెండ్స్ హై వోల్టేజ్ పోరు

ఏషియన్ లెజెండ్స్ లీగ్ 2026లో అభిమానులు అత్యంత ఆసక్తిగా ఎదురుచూస్తున్న భారత్-పాకిస్థాన్ పోరు ఆదివారం జాంబియాలోని లుసాకాలో జరగనుంది. భారత కాలమానం ప్రకారం సాయంత్రం 4:00 గంటలకు ప్రారంభమయ్యే ఈ మ్యాచ్‌ను సోనీ స్పోర్ట్స్ నెట్‌వర్క్ ఛానళ్లతో పాటు ఫ్యాన్‌కోడ్ యాప్, వెబ్‌సైట్‌లో ప్రత్యక్ష ప్రసారంగా వీక్షించవచ్చు. శిఖర్ ధావన్ సారథ్యంలో దినేష్ కార్తీక్, సురేష్ రైనా, హర్భజన్ సింగ్, యూసుఫ్ పఠాన్, అంబటి రాయుడు వంటి మాజీ స్టార్ ఆటగాళ్లతో ఇండియన్ రాయల్స్ బరిలోకి దిగుతుండగా, మహమ్మద్ హఫీజ్ నేతృత్వంలో షోయబ్ మాలిక్, ఉమర్ అక్మల్, వహాబ్ రియాజ్, సయీద్ అజ్మల్ వంటి అనుభవజ్ఞులతో పాకిస్థాన్ పాంథర్స్ పోటీకి సిద్ధమైంది.

తొలి మ్యాచ్‌లో బంగ్లాదేశ్ టైగర్స్‌పై 19 పరుగుల తేడాతో గెలిచిన భారత్ ఆత్మవిశ్వాసంతో ఈ మ్యాచ్‌కు వస్తోంది. మరోవైపు ఏషియన్ స్టార్స్ చేతిలో 85 పరుగుల తేడాతో ఓడిన పాకిస్థాన్ ఈ మ్యాచ్‌ను తప్పక గెలవాల్సిన పరిస్థితిలో ఉంది. జూలై 30 నుంచి ఆగస్టు 10 వరకు మొత్తం 19 టీ20 మ్యాచ్‌లతో జరుగుతున్న ఈ టోర్నీలో ఆసియా మాజీ దిగ్గజ క్రికెటర్లు మళ్లీ ఒకే వేదికపై కనిపిస్తుండగా, భారత్-పాకిస్థాన్ పోరే ఈ లీగ్‌లో అత్యంత ప్రత్యేక ఆకర్షణగా నిలిచింది.