హైదరాబాద్‌లో ఇందిరమ్మ ఇళ్లకు భారీ ఊతం

హైదరాబాద్‌లోని క్యూర్ పరిధిలో ఇందిరమ్మ ఇళ్ల తొలి దశను తెలంగాణ ప్రభుత్వం ప్రారంభించింది. తొలి విడతలో 16 అసెంబ్లీ నియోజకవర్గాల్లో ఒక్కో నియోజకవర్గానికి 500 ఇళ్ల చొప్పున నిర్మాణాలు చేపట్టనున్నట్లు రెవెన్యూ, హౌసింగ్ శాఖ మంత్రి పొంగులేటి శ్రీనివాసరెడ్డి తెలిపారు. త్వరలో మరో ఎనిమిది నియోజకవర్గాలకు ఈ పథకాన్ని విస్తరించనున్నట్లు వెల్లడించారు. లబ్ధిదారులు నివసిస్తున్న ప్రాంతాల్లోనే 525 చదరపు అడుగుల విస్తీర్ణంలో ఇళ్లను నిర్మించనున్న ప్రభుత్వం, జూలై 21 నుంచి మీసేవ, వాట్సాప్, అధికారిక వెబ్‌సైట్ ద్వారా దరఖాస్తులు స్వీకరించనుంది.

రాష్ట్రవ్యాప్తంగా ఇప్పటికే 8 లక్షల ఇళ్లను వివిధ దశల్లో మంజూరు చేసిన ప్రభుత్వం, వచ్చే నెలలోనే 2 లక్షలకు పైగా ఇళ్లు పూర్తయ్యేలా చర్యలు తీసుకుంటోంది. ఒక్కో ఇంటికి ప్రభుత్వం రూ.5 లక్షల ఆర్థిక సాయం అందించగా, మిగిలిన నిర్మాణ వ్యయాన్ని విడతల వారీగా వసూలు చేయనుంది. కుటుంబ వార్షిక ఆదాయం రూ.6 లక్షలకు లోపు ఉండటం, క్యూర్ పరిధిలో స్వంత ఇల్లు లేదా స్థలం లేకపోవడం వంటి అర్హతలు తప్పనిసరి. వచ్చే ఏడాది బోనాల నాటికి కొత్త ఇందిరమ్మ ఇళ్ల నుంచే పండుగను ప్రారంభించేలా నిర్మాణాలు వేగంగా పూర్తి చేస్తామని మంత్రి పొంగులేటి తెలిపారు.