రామాయణంలో యష్ రావణుడిగా ఎలా ఎంపికయ్యాడు?

దర్శకుడు నితీష్ తివారి తెరకెక్కిస్తున్న రామాయణం భారతీయ సినీ పరిశ్రమలో అత్యంత ప్రతిష్టాత్మకంగా రూపొందుతున్న చిత్రాల్లో ఒకటి. ఇందులో రణబీర్ కపూర్ శ్రీరాముడిగా, సాయి పల్లవి సీతగా, యష్ రావణుడిగా నటిస్తున్నారు. ఇటీవల విడుదలైన ట్రైలర్‌లో యష్ స్క్రీన్ ప్రెజెన్స్ విశేషంగా ఆకట్టుకోగా, ఆయన ఈ ప్రాజెక్ట్‌లోకి ఎలా వచ్చారనే విషయం ఇప్పుడు ఆసక్తికర చర్చగా మారింది. కేజీఎఫ్: చాప్టర్ 2ను దాదాపు ఐదేళ్ల క్రితం చూసిన నిర్మాత నమిత్ మల్హోత్రా, యష్‌నే రావణ పాత్రకు సరైన ఎంపికగా భావించినట్లు సమాచారం.

పలు సినీ వర్గాల కథనాల ప్రకారం, ప్రారంభంలో యష్ ఈ ప్రాజెక్ట్‌లో నటుడిగా గానీ, నిర్మాతగా గానీ భాగం కాలేదు. అనంతరం నమిత్ మల్హోత్రా తన విజన్‌ను వివరించడంతో యష్ ఈ చిత్రంలో నటించడమే కాకుండా నిర్మాతగా కూడా బాధ్యతలు స్వీకరించినట్లు తెలుస్తోంది. రెండు భాగాలుగా రూపొందుతున్న ఈ భారీ చిత్రం ఈ ఏడాది దీపావళి సందర్భంగా ప్రపంచవ్యాప్తంగా విడుదల కానుండగా, హాన్స్ జిమ్మర్ మరియు ఏ.ఆర్. రెహమాన్ సంగీతం అందిస్తున్నారు.