రిషబ్ శెట్టి సినిమాకు హాలీవుడ్ యాక్షన్ టీమ్

‘కాంతార’తో జాతీయ స్థాయిలో గుర్తింపు పొందిన రిషబ్ శెట్టి, ఇప్పుడు ఛత్రపతి శివాజీ మహారాజ్ జీవితగాథ ఆధారంగా తెరకెక్కుతున్న ‘ది ప్రైడ్ ఆఫ్ భారత్’ చిత్రంలో నటించనున్నారు. సందీప్ సింగ్ దర్శకత్వంలో రెండు భాగాలుగా రూపొందుతున్న ఈ భారీ ప్రాజెక్ట్‌ను సుమారు రూ.500 కోట్ల వ్యయంతో నిర్మిస్తున్నారు. అత్యున్నత స్థాయి యుద్ధ సన్నివేశాల కోసం ‘గేమ్ ఆఫ్ థ్రోన్స్’, ‘వైకింగ్స్’ వంటి అంతర్జాతీయ ప్రాజెక్టులకు పనిచేసిన హాలీవుడ్ యాక్షన్ డిజైనర్ మార్క్ హెన్సన్ బృందాన్ని చిత్రానికి తీసుకొచ్చారు.

ప్రస్తుతం ‘జై హనుమాన్’ చిత్రీకరణలో ఉన్న రిషబ్ శెట్టి, అది పూర్తయ్యాక ఈ సినిమాకు ప్రత్యేకంగా సిద్ధం కానున్నారు. మహారాష్ట్రలోని పలు చారిత్రక ప్రాంతాల్లో షూటింగ్ నిర్వహించనుండగా, రాజమాత జిజాబాయి పాత్రలో షెఫాలీ షా, ఔరంగజేబుగా వివేక్ ఒబెరాయ్, మరో కీలక పాత్రలో అర్జున్ రాంపాల్ నటిస్తున్నారు. భారీ తారాగణం, అంతర్జాతీయ సాంకేతిక నిపుణుల భాగస్వామ్యంతో ఈ చిత్రంపై దేశవ్యాప్తంగా ఆసక్తి పెరుగుతోంది.