భవిష్యత్ యుద్ధాలకు ట్యాంకులు మారాలని జనరల్ అనిల్ చౌహాన్

ఆధునిక యుద్ధాల స్వరూపం వేగంగా మారుతున్నప్పటికీ ట్యాంకులు, ఎయిర్‌క్రాఫ్ట్ క్యారియర్లు ఇంకా కీలకమైన సైనిక వనరులుగానే ఉంటాయని మాజీ చీఫ్ ఆఫ్ డిఫెన్స్ స్టాఫ్ జనరల్ అనిల్ చౌహాన్ పేర్కొన్నారు. ప్రస్తుతం మూడు నుంచి నాలుగు కిలోమీటర్ల పరిధిలోనే దాడి చేసే ట్యాంకులు భవిష్యత్తులో 40 నుంచి 50 కిలోమీటర్ల దూరంలో ఉన్న లక్ష్యాలను గుర్తించి దాడి చేసే సామర్థ్యాన్ని సొంతం చేసుకోవాలని ఆయన సూచించారు. ఇందుకోసం ఐఎస్‌ఆర్ వ్యవస్థలు, డ్రోన్ సమన్వయం, నెట్‌వర్క్ ఆధారిత యుద్ధ విధానాలు, డ్రోన్ టాప్ అటాక్‌ల నుంచి రక్షణ కలిగించే కొత్త డిజైన్ అవసరమని వివరించారు.

ఎయిర్‌క్రాఫ్ట్ క్యారియర్ల ప్రాధాన్యతపై మాట్లాడుతూ, యుద్ధ సమయంలోనే కాకుండా శాంతికాలంలో కూడా అవి దేశ శక్తిని ప్రదర్శించే ప్రధాన సాధనమని చెప్పారు. జలాంతర్గాముల ప్రాధాన్యత పెరుగుతున్నప్పటికీ అవి ఎయిర్‌క్రాఫ్ట్ క్యారియర్లకు ప్రత్యామ్నాయం కావని స్పష్టం చేశారు. హిందూ మహాసముద్ర ప్రాంతంలో భారత వ్యూహాత్మక ఉనికిని కొనసాగించడంలో, ప్రత్యర్థులను నిరోధించడంలో ఎయిర్‌క్రాఫ్ట్ క్యారియర్లు కీలక పాత్ర పోషిస్తాయని ఆయన అభిప్రాయపడ్డారు.