తిరుమలలో ఆంజనేయ స్వామి విగ్రహం చోరీపై భూమన ఆరోపణలు

తిరుమల మెట్ల మార్గంలో ఉన్న శతాబ్దాల నాటి ఆంజనేయ స్వామి విగ్రహం చోరీకి గురైందని మాజీ టీటీడీ చైర్మన్ భూమన కరుణాకరరెడ్డి ఆరోపించారు. తిరుపతిలో మీడియాతో మాట్లాడుతూ ప్రతిరోజూ వేలాది మంది భక్తులు దర్శించే ఈ విగ్రహం అత్యంత ప్రాముఖ్యమైందని తెలిపారు. ఘటనకు సంబంధించిన దృశ్యాలు సీసీటీవీ కెమెరాల్లో నమోదయ్యాయని, తిరుమల భద్రతా వ్యవస్థపై తీవ్ర ప్రశ్నలు తలెత్తుతున్నాయని పేర్కొంటూ రాష్ట్ర ప్రభుత్వం బాధ్యత వహించాలని డిమాండ్ చేశారు.

చోరీ చేసిన వ్యక్తిని మానసిక సమస్యలు ఉన్న వ్యక్తిగా చూపించే ప్రయత్నం జరుగుతోందని తమకు సమాచారం ఉందని భూమన ఆరోపించారు. ముఖ్యమంత్రి చంద్రబాబు నాయుడు ఈ ఘటనపై బాధ్యత స్వీకరించాలని, టీటీడీ పాలకమండలి చైర్మన్ బీఆర్ నాయుడు వెంటనే రాజీనామా చేయాలని డిమాండ్ చేశారు. ప్రతి ఏడాది హనుమాన్ జయంతి సందర్భంగా ప్రత్యేక పూజలు జరిగే ఈ విగ్రహం చోరీ కావడం కోట్లాది మంది భక్తుల మనోభావాలను దెబ్బతీసిందని ఆయన అన్నారు.