ఆలస్యమైన జనన, మరణ నమోదు నిబంధనలు కఠినతరం

జనన, మరణాల ఆలస్య నమోదును మరింత కట్టుదిట్టం చేయడానికి కేంద్ర ప్రభుత్వం రిజిస్ట్రేషన్ ఆఫ్ బర్త్స్ అండ్ డెత్స్ (సవరణ) బిల్లు–2026ను ప్రతిపాదించింది. ఈ ముసాయిదా ప్రకారం రెండు సంవత్సరాలకు మించి ఆలస్యంగా నమోదు చేసే దరఖాస్తులకు ఇకపై ఎగ్జిక్యూటివ్ మేజిస్ట్రేట్ కాకుండా ఫస్ట్ క్లాస్ జ్యుడీషియల్ మేజిస్ట్రేట్ అనుమతి తప్పనిసరి అవుతుంది. ఒకటి నుంచి రెండు సంవత్సరాల మధ్య ఆలస్యమైన నమోదులకు ప్రస్తుతం అమల్లో ఉన్న జిల్లా మేజిస్ట్రేట్, సబ్ డివిజనల్ మేజిస్ట్రేట్ లేదా ఎగ్జిక్యూటివ్ మేజిస్ట్రేట్ అనుమతి విధానం కొనసాగుతుంది.

పౌర నమోదు వ్యవస్థ విశ్వసనీయతను పెంచడంతో పాటు నకిలీ లేదా అనవసరంగా ఆలస్యమైన నమోదులను అరికట్టడమే ఈ మార్పుల ప్రధాన ఉద్దేశం. ఆలస్యంగా వచ్చిన ప్రతి దరఖాస్తులోని వివరాల ప్రామాణికతను అధికారులు తప్పనిసరిగా పరిశీలించిన తర్వాతే అనుమతి ఇవ్వాలి. అలాగే నిర్ణయించిన రుసుమును కూడా దరఖాస్తుదారులు చెల్లించాల్సి ఉంటుంది. జనన, మరణ ధ్రువీకరణ పత్రాలు గుర్తింపు, విద్య, పాస్‌పోర్ట్, వారసత్వం, బీమా క్లెయిమ్‌లు, పెన్షన్, ఆస్తుల బదిలీ, ప్రభుత్వ సంక్షేమ పథకాల వంటి అనేక చట్టపరమైన అవసరాలకు కీలక పత్రాలుగా ఉండటంతో సమయానికి నమోదు మరింత ప్రాధాన్యం సంతరించుకోనుంది.