ఆగస్టుతో టాలీవుడ్‌కు మళ్లీ సక్సెస్ ట్రాక్?

2026 తొలి అర్ధభాగంలో వరుస ఫ్లాప్‌లతో తీవ్ర ఇబ్బందులు ఎదుర్కొన్న టాలీవుడ్ ఇప్పుడు క్రమంగా కోలుకునే ప్రయత్నంలో ఉంది. జూలైలో విడుదలైన చిత్రాల్లో చెన్నై లవ్ స్టోరీ మాత్రమే డిస్ట్రిబ్యూటర్లకు లాభాలు అందించింది. సుమారు ₹13 కోట్ల థియేట్రికల్ బిజినెస్ చేసిన ఈ చిత్రం తొలి వారంలోనే ₹21 కోట్లకు పైగా వసూళ్లు సాధించినట్లు ట్రేడ్ వర్గాలు చెబుతున్నాయి. మరోవైపు నాగబంధం, రావు బహదూర్ ఆశించిన ఫలితాలు అందుకోలేకపోగా, జయకృష్ణ హీరోగా పరిచయమైన శ్రీనివాస మంగాపురం కూడా బాక్సాఫీస్ వద్ద పెద్దగా ప్రభావం చూపలేకపోయింది.

ఇప్పుడు టాలీవుడ్ ఆశలన్నీ ఆగస్టు నెలపై నిలిచాయి. ఆగస్టు 7న వరుణ్ తేజ్ నటించిన కొరియన్ కనకరాజు, లోకేష్ కనకరాజ్ నటించిన డీసీ విడుదల కానుండగా, ఆగస్టు 14న సూర్య నటించిన విశ్వనాథ్ అండ్ సన్స్ ప్రేక్షకుల ముందుకు రానుంది. ఆగస్టు 21న రవితేజ కొత్త చిత్రం, ఆగస్టు 26న యష్ భారీ పాన్ ఇండియా సినిమా టాక్సిక్ విడుదల కానున్నాయి. ఈ వరుస క్రేజీ రిలీజ్‌లు టాలీవుడ్‌కు మరోసారి బాక్సాఫీస్ ఊపిరి పోస్తాయా అనే ఆసక్తి సినీ వర్గాల్లో నెలకొంది.