కెమెరాతో యాపిల్ ఎయిర్‌పాడ్స్ ఈ ఏడాదే రానున్నాయా?

యాపిల్ 2026 చివరి నాటికి అంతర్నిర్మిత కెమెరాలతో కూడిన తొలి ఎయిర్‌పాడ్స్‌ను విడుదల చేసే అవకాశముందని నివేదికలు చెబుతున్నాయి. B790 అనే అంతర్గత కోడ్ పేరుతో అభివృద్ధి చేస్తున్న ఈ మోడల్‌కు సంబంధించిన వివరాలు iOS 27 కోడ్‌లో కనిపించాయని సమాచారం. ఇందులోని కెమెరాలు పరిసరాల్లోని వస్తువులు, దృశ్యాలను గుర్తించి విజువల్ ఇంటెలిజెన్స్ ఫీచర్లకు మద్దతు ఇవ్వనున్నట్లు తెలుస్తోంది.

యాపిల్ ప్రస్తుతం B790, B798 అనే రెండు వేర్వేరు వెర్షన్లపై పని చేస్తున్నట్లు సమాచారం. వాటిలో B798ను 2027లో విడుదల చేసే అవకాశం ఉందని గత నివేదికలు సూచించగా, B790 మాత్రం ముందుగానే మార్కెట్‌లోకి వచ్చే అవకాశముంది. కెమెరా హార్డ్‌వేర్ కోసం పొడవైన స్టెమ్ డిజైన్, డేటా ప్రసారం సమయంలో వెలిగే ఎల్‌ఈడి సూచిక వంటి ఫీచర్లు ఉండవచ్చని ప్రచారం జరుగుతున్నప్పటికీ, ఈ ఉత్పత్తిపై యాపిల్ ఇంకా అధికారిక ప్రకటన చేయలేదు.