తేలప్రోలు వద్ద ప్రైవేట్ బస్సు బోల్తా.. 12 మందికి తీవ్ర గాయాలు

కృష్ణా జిల్లా గన్నవరం నియోజకవర్గంలోని ఉంగుటూరు మండలం తేలప్రోలు సమీపంలో జాతీయ రహదారి-16పై తెల్లవారుజామున ఘోర రోడ్డు ప్రమాదం చోటుచేసుకుంది. చెన్నై నుంచి విశాఖపట్నం వైపు 26 మందికిపైగా ప్రయాణికులతో వెళ్తున్న వైబీఎం ట్రావెల్స్ బస్సు అదుపుతప్పి రోడ్డుమధ్యలో ఉన్న డివైడర్‌పై బోల్తా పడింది. ఈ ప్రమాదంలో సుమారు 12 మంది ప్రయాణికులు తీవ్రంగా గాయపడగా, పలువురికి స్వల్ప గాయాలయ్యాయి.

ప్రమాదం జరిగిన సమయంలో బస్సు వెనుక నుంచి వస్తున్న ఓ లారీ బస్సును తప్పించుకునే ప్రయత్నంలో ఢీకొనడంతో లారీ డ్రైవర్ కాళ్లకు తీవ్ర గాయాలయ్యాయి. క్షతగాత్రులందరినీ అంబులెన్సుల ద్వారా చిన్న అవుటపల్లిలోని డాక్టర్ పిన్నమనేని సిద్ధార్థ ఆస్పత్రికి తరలించి చికిత్స అందిస్తున్నారు. సమాచారం అందుకున్న గన్నవరం డీఎస్పీ ధర్మేంద్ర, ఆత్కూరు పోలీసులు ఘటనాస్థలానికి చేరుకుని సహాయక చర్యలు చేపట్టి, ఆస్పత్రిలో క్షతగాత్రులను పరామర్శించారు.