తొలి సినిమా ప్రమోషన్లకు పిలవలేదు.. ఆసక్తికర విషయం చెప్పిన రితిక నాయక్

‘అశోకవనంలో అర్జున కళ్యాణం’ సినిమాతో టాలీవుడ్‌లో అడుగుపెట్టిన రితిక నాయక్ తన కెరీర్ ప్రారంభ రోజుల్లో ఎదురైన ఓ భావోద్వేగ అనుభవాన్ని పంచుకుంది. ప్రస్తుతం ‘కొరియన్ కనకరాజు’ సినిమా ప్రమోషన్లలో పాల్గొంటున్న ఆమె, తన తొలి సినిమా ప్రమోషన్లకు తనను అసలు పిలవలేదని తెలిపింది. ఆ విషయం తనను ఎంతో బాధపెట్టిందని, ఆ సమయంలో తన స్నేహితురాలితో ఆ బాధను పంచుకున్నానని వెల్లడించింది.

అయితే సినిమా విడుదలైన తర్వాత పరిస్థితి పూర్తిగా మారిపోయిందని, అందులో నటించిన వారందరిలో తనకే ఎక్కువ గుర్తింపు వచ్చిందని రితిక చెప్పింది. ‘మీరాయ్’ విజయంతో మంచి గుర్తింపు సంపాదించిన ఆమె, సహజమైన నటనతో ప్రేక్షకులను ఆకట్టుకుంటూ తనకంటూ ప్రత్యేక స్థానం ఏర్పరుచుకుంది. ఆగస్టు 7న విడుదల కానున్న వరుణ్ తేజ్ హీరోగా మెర్లపాక గాంధీ దర్శకత్వంలో తెరకెక్కిన ‘కొరియన్ కనకరాజు’పై ఆమె భారీ ఆశలు పెట్టుకుంది.