ఉత్తర ఒడిశా వరదలు తీవ్రం.. 1.25 లక్షల మంది ప్రభావితం

ఎడతెరిపి లేకుండా కురుస్తున్న వర్షాల కారణంగా ఉత్తర ఒడిశాలో ప్రధాన నదులు ఉప్పొంగి గ్రామాలు నీటమునిగాయి. దీంతో ఐదు జిల్లాల్లో 1.25 లక్షలకు పైగా ప్రజలు వరదల ప్రభావానికి గురయ్యారు. పరిస్థితి తీవ్రంగా ఉండటంతో జిల్లా యంత్రాంగం సహాయక చర్యలను వేగవంతం చేసి, లోతట్టు ప్రాంతాల నుంచి సుమారు 50 వేల మందిని సురక్షిత ప్రాంతాల్లోని సహాయ శిబిరాలకు తరలించింది. ముందస్తు జాగ్రత్తగా 10 జిల్లాల్లో పాఠశాలలను మూసివేశారు.

భారత వాతావరణ శాఖ వచ్చే 24 గంటల్లో రాష్ట్రంలోని పలు ప్రాంతాల్లో భారీ నుంచి అతి భారీ వర్షాలు కురిసే అవకాశం ఉందని హెచ్చరించింది. మరిన్ని ప్రాంతాల్లో వరద ముప్పు పెరిగే అవకాశాన్ని దృష్టిలో ఉంచుకుని అధికారులు అప్రమత్తంగా ఉండగా, సహాయక బృందాలు పరిస్థితిని నిరంతరం పర్యవేక్షిస్తూ బాధితులకు అవసరమైన సహాయాన్ని అందిస్తున్నాయి.