జగన్ శ్రీకాకుళం పర్యటనకు పోలీసుల కఠిన ఆంక్షలు

వైఎస్సార్‌సీపీ అధ్యక్షుడు వైఎస్ జగన్ మోహన్ రెడ్డి శ్రీకాకుళం పర్యటనకు పోలీసులు కఠిన నిబంధనలు విధించారు. మాజీ మంత్రి సీదిరి అప్పలరాజును జిల్లా జైలులో కలిసి పరామర్శించేందుకు మాత్రమే అనుమతి ఇచ్చారు. ర్యాలీలు, బహిరంగ సభలు, సమావేశాలకు అనుమతి నిరాకరించడంతో పాటు జగన్ కాన్వాయ్‌లో ఎనిమిది వాహనాలకు మాత్రమే అనుమతి మంజూరు చేశారు. అంపోలు జైలు పరిసరాలు, శ్రీకాకుళం పట్టణంలో భారీగా పోలీసు బందోబస్తు ఏర్పాటు చేశారు.

రాజకీయ ఉద్రిక్తతలు, పెద్ద ఎత్తున ప్రజలు తరలివచ్చే అవకాశాన్ని దృష్టిలో ఉంచుకుని ఈ ఆంక్షలు విధించినట్లు అధికారులు తెలిపారు. నిబంధనలు ఉల్లంఘించిన పక్షంలో చట్టపరమైన చర్యలు తీసుకుంటామని పోలీసులు హెచ్చరించారు. ఇదిలా ఉండగా, జగన్ శ్రీకాకుళం పర్యటనకు ముందు విశాఖపట్నం విమానాశ్రయానికి భారీ సంఖ్యలో వైఎస్సార్‌సీపీ కార్యకర్తలు, అభిమానులు చేరుకుని ఆయనకు స్వాగతం పలికారు.