‘మైఖేల్’ ఓటీటీ రిలీజ్ డేట్ ఫిక్స్.. జియో హాట్‌స్టార్‌లో స్ట్రీమింగ్‌కు సిద్ధం

ప్రపంచ ప్రఖ్యాత పాప్ సంగీత దిగ్గజం మైఖేల్ జాక్సన్ జీవిత కథ ఆధారంగా రూపొందిన హాలీవుడ్ బయోపిక్ ‘మైఖేల్’ థియేటర్లలో సంచలన విజయాన్ని నమోదు చేసిన తర్వాత ఇప్పుడు ఓటీటీ ప్రేక్షకుల ముందుకు రానుంది. ప్రముఖ దర్శకుడు ఆంటోయిన్ ఫుక్వా తెరకెక్కించిన ఈ చిత్రం ప్రపంచవ్యాప్తంగా 1 బిలియన్ డాలర్లకు పైగా వసూళ్లు సాధించి, సుమారు రూ.9,500 కోట్ల గ్రాస్ కలెక్షన్లతో తొలి బిలియన్ డాలర్ హాలీవుడ్ బయోపిక్‌గా చరిత్ర సృష్టించింది. సంగీతం, డ్యాన్స్, భావోద్వేగాలు, అద్భుతమైన విజువల్స్‌తో ఈ చిత్రం ప్రేక్షకులను విశేషంగా ఆకట్టుకుంది.

మైఖేల్ జాక్సన్ మేనల్లుడు జాఫర్ జాక్సన్ ప్రధాన పాత్రలో నటించి, ఆయన హావభావాలు, మూన్‌వాక్, స్టేజ్ ప్రెజెన్స్‌ను అచ్చం మైఖేల్‌లాగే ఆవిష్కరించి ప్రశంసలు అందుకున్నాడు. జో జాక్సన్ పాత్రలో కోల్‌మన్ డొమింగో, కేథరిన్ జాక్సన్ పాత్రలో నియా లాంగ్ నటించారు. ఇప్పటికే అమెజాన్ ప్రైమ్ వీడియో, ఆపిల్ టీవీ, బుక్ మై షో స్ట్రీమ్‌లో రెంటల్ రూపంలో అందుబాటులో ఉన్న ఈ చిత్రం, ఆగస్టు 29 నుంచి జియో హాట్‌స్టార్‌లో ఇంగ్లీష్, హిందీ భాషల్లో అదనపు రెంటల్ ఛార్జీలు లేకుండా స్ట్రీమింగ్ కానుంది.