స్మార్ట్‌ఫోన్లలో టీవీ కోసం మళ్లీ సిద్ధమైన మలక్‌పేట్ టవర్

ఒకప్పుడు ఇంటి పైకప్పులపై అమర్చిన యాంటెనాల ద్వారా దూరదర్శన్ ప్రసారాలను ప్రతి ఇంటికి చేరవేసిన హైదరాబాద్ మలక్‌పేట్ టీవీ టవర్ ఇప్పుడు కొత్త బాధ్యతకు సిద్ధమవుతోంది. దాదాపు 50 ఏళ్ల చరిత్ర కలిగిన ఈ టవర్‌ను డిజిటల్ మొబైల్ బ్రాడ్‌కాస్టింగ్ కోసం వినియోగిస్తున్నారు. ప్రస్తుతం ట్రయల్స్ కొనసాగుతుండగా, ప్రత్యేక మొబైల్ యాప్ ద్వారా ఇంటర్నెట్ లేదా సబ్‌స్క్రిప్షన్ లేకుండానే టీవీ ఛానళ్లను వీక్షించే అవకాశం కల్పించేందుకు ప్రణాళికలు రూపొందిస్తున్నారు.

దూరదర్శన్ కేంద్రం హైదరాబాద్ అధికారుల ప్రకారం స్టూడియో నుంచి ఉపగ్రహానికి చేరిన సిగ్నల్‌ను మలక్‌పేట్ టవర్ స్వీకరించి సుమారు 60 కిలోమీటర్ల పరిధిలోని స్మార్ట్‌ఫోన్లకు నేరుగా ప్రసారం చేస్తుంది. ప్రారంభ దశలో డీడీ యాదగిరి, డీడీ సప్తగిరి, డీడీ నేషనల్, డీడీ న్యూస్, డీడీ స్పోర్ట్స్ వంటి ఛానళ్లు అందుబాటులోకి వచ్చే అవకాశం ఉంది. ట్రయల్స్ విజయవంతమైతే ఏడాది లోపు సేవలు ప్రారంభించాలని లక్ష్యంగా పెట్టుకోగా, భవిష్యత్తులో వేలం విధానం ద్వారా ప్రైవేట్ ఛానళ్లను కూడా చేర్చే అవకాశాన్ని అధికారులు పరిశీలిస్తున్నారు.