కూల్చివేతపై హైడ్రాను నిలదీసిన హైకోర్టు

కొండాపూర్‌లోని 350 చదరపు గజాల ప్రైవేట్ స్థలంలో నిర్మాణాలను కూల్చివేసిన ఘటనపై విచారణ సందర్భంగా తెలంగాణ హైకోర్టు హైడ్రాపై తీవ్ర అసంతృప్తి వ్యక్తం చేసింది. భూ రికార్డులు పరిశీలించకుండా, సరైన సర్వే నిర్వహించకుండా, చట్టబద్ధమైన నోటీసు ఇవ్వకుండా ఎలా కూల్చివేత చేపట్టారని న్యాయమూర్తి ఎన్.వి. శ్రవణ్ కుమార్ ప్రశ్నించారు. ఈ చర్యకు తాను ఎలాంటి ఆదేశాలు ఇవ్వలేదని సంబంధిత తహసీల్దార్ కోర్టుకు తెలియజేయడం కూడా కేసులో కీలక అంశంగా మారింది.

చట్టపరమైన విధానాలను విస్మరించి, కోర్టు ఆదేశాలను పట్టించుకోకుండా అధికారులు వ్యవహరిస్తే రాజ్యాంగ న్యాయస్థానాలు జోక్యం చేసుకోవాల్సిందేనని హైకోర్టు స్పష్టం చేసింది. కోర్టులను తప్పుదోవ పట్టిస్తున్నది ప్రభుత్వ సంస్థలేనని వ్యాఖ్యానించిన న్యాయస్థానం, అన్ని ప్రతివాదులు వారం రోజుల్లో కౌంటర్ అఫిడవిట్లు దాఖలు చేయాలని ఆదేశించింది. కేసు తుది విచారణ పూర్తయ్యే వరకు సెరిలింగంపల్లి తహసీల్దార్ ప్రతి విచారణకు హాజరుకావాలని కూడా ఆదేశించింది.